ශ‍්‍රී ලංකාව 3-0 කින් තරගාවලිය ජය ලබයි

by යොහාන් භාසුර පල්ලෙකැලේ සිට Syndicated from wisdensrilanka,


ශ‍්‍රී ලංකා ක‍්‍රීඩකයෝ සංචාරක බටහිර ඉන්දීය කොදෙව් පිලට එරෙහිව පැවැති තරග තුනකින් සමන්විත වූ එක්දින ක‍්‍රිකට් තරගාවලිය 3-0 කින් ජය ලැබීමට අද (07) සමත් වූහ.
 මහනුවර, පල්ලෙකැලේ ජාත්‍යන්තර ක‍්‍රිකට් ක‍්‍රීඩාංගණයේදී අද පැවැති තෙවැනි සහ අවසන් එක්දින තරගයෙන් ශ‍්‍රී ලංකා පිල ලකුණු 19 ක (ඩක්වත් ලූවිස් න්‍යායට) ජයක් ලැබීය. ශ‍්‍රී ලංකාව ලැබූ මෙම 3-0 ක තරගාවලි ජයග‍්‍රහණයත් සමග එක්දින ශ්‍රේණිගත කිරීමේ ප‍්‍රසාද ලකුණු දෙකක් හිමිවන අතර ඒ අනුව ශ‍්‍රී ලංකාවේ ප‍්‍රසාද ලකුණු සංඛ්‍යාව 105 ක් දක්වා ඉහළ නැංවිණි. ශ‍්‍රී ලංකාව ප‍්‍රසාද ලකුණු 105 ක් ලබා එක්දින ශ්‍රේණිගත කිරීමේ පස්වැනි ස්ථානයේ පසු වන අතර නවසීලන්තය ප‍්‍රසාද ලකුණු 109 ක් ලබා සිවුවැනි ස්ථානයේ සිටියි. ඩක්වත් ලූවිස් න්‍යායට අනුව ලකුණු 190 ක ජයග‍්‍රාහි ඉලක්කය හඹාගිය ශ‍්‍රී ලංකා ඉනිමේ 33 වැනි  ඕවරයේදී රාත‍්‍රී 11.30 ට පමණ තෙවැනි වරටත් වර්ෂාව ඇද හැලූණු අතර ඒ අනුව තරගය අවසන් කළේය. ශ‍්‍රී ලංකාව ඒ වන විට කඩුලූ 5 ක් දැවී ලකුණු 180 ක් ලබා සිටි අතර ඕවර 32.3 ක් වන විට ජයග‍්‍රහණයට අවශ්‍යව තිබුණේ ලකුණු 161 ක් පමණි. කුසල් පෙරේරා පිට පිටම දෙවැනි අර්ධ ශතකය ලෙස පන්දු 47 කදී හතරේ සහ හයේ පහර දෙක බැගින් අන්තර්ගතකරමින් ලකුණු 50 ක් රැස් කළේය. මෙය කුසල්ගේ හත්වැනි එක්දින අර්ධ ශතකයයි. දෙවැනි වරට වර්ෂාව නිසා මිනිත්තු 135 ක් අපතේ යෑමෙන් ඉනිමක්  ඕවර 36 කට සීමා විය. මාලන් සැමුවෙල්ස් අන්තයක් ආරක්‍ෂා කරගනිමින් පන්දු 95 කදී හතරේ පහර 15 ක් සහ හයේ පහරක් සමගින් නොදැවී ලකුණු 110 ක් රැස්කිරීමට සමත් විය. මාලන් සැමුවෙල්ස් සහ කාලෝස් බ‍්‍රැත්වෙයිට් 8 වැනි කඩුල්ලට පන්දු 31 කදී ගොඩනැගූ ලකුණු 55 ක වේගවත් සම්බන්ධතාව නිසා ලකුණු 206 ක් දක්වා පැමිණීමට අවස්ථාව ලැබුණි. ලසිත් මාලිංග යැවූ ඉනිමේ 25 වැනි  ඕවරයට හයේ පහරක් සහ හතරේ පහර 2 ක් සමගින් ලකුණු 15 ක් රැස්කරමින් සැමුවෙල්ස් සහ කාලෝස් ලකුණු මැෂිම ක‍්‍රියාත්මක කිරීම ආරම්භ කළහ. දුෂ්මන්ත චමීර දෙවැනි වර නැවත ආරම්භයෙන් පසු දෙවැනි පන්දුවෙන් ප‍්‍රවේගකාරී පිතිකරු නායක ජේසන් හෝල්ඩර්ගේ ඉනිම ලකුණු 19 කට සීමා කරමින් ශ‍්‍රී ලංකා පිල තවදුරටත් ඉදිරියෙන් තැබීමට සමත් විය. පස්වරු 5.30 ට පමණ දෙවැනි වරටත් වර්ෂාව ඇද හැලීම නිසා තරගය තාවකාලිකව අත්හිටුවූ අතර රාත‍්‍රී 7.45 ට නැවත තරගය ආරම්භ කළේය.  දෙවැනි වරට වර්ෂාව පතිත වන විට කොදෙව් පිල  ඕවර 23.3 කදී කඩුලූ 6 ක් දැවී ලකුණු 105 ක් රැස්කර සිටියේය. දිනේෂ් රැම්ඞීන් මුඵ ලකුණු සංඛ්‍යාව 52 දී පස්වැනි කඩුල්ල ලෙස දැවී යෑමත් සමග කොදෙව් පිල දැඩි අවිනිශ්චිත තත්ත්වයකට පත්විය. ඩැරන් බ‍්‍රාවෝ ලකුණු 4 ක් ලබා සිටියදී සුරංග ලක්මාල් කඩුල්ල තුළට දෝලනය වන ලෙස යැවූ පන්දුව නිදැල්ලේ යැවීමේදී පන්දුව කෙළින්ම කඩුල්ලේ වැදීමෙන් දැවී යෑමත් සමග ලකුණු 18 කට කඩුලූ 4 ක් බවට පත්විය. ලසිත් මාලිංග නැවතත් ක‍්‍රියාත්මක වීමේ ප‍්‍රතිඵලයෙන් ජර්මේන් බ්ලැක්වුඞ් (2) තෙවැනි කඩුල්ල ලෙස පිටියෙන් ඉවත් විය. පළමු වරට වර්ෂාවට තරගය අත්හිටුවීමෙන් පැයක පමණ තරගය අත්හිටුවීමට සිදුවූ අතර එහෙත් ඕවර සංඛ්‍යාවේ අඩුවක් නොවීය.  වර්ෂාව හේතුවෙන් පස්වරු 2.50 ට පමණ තරගය අත්හිටුවන විට කොදෙව් පිල  ඕවර 3.4 කදී කඩුලූ 2 ක් දැවී ලකුණු 12 ක් රැස්කර සිටියේය. සුරංග ලක්මාල්ගේ පන්දුවකට ඇන්ඩි‍්‍ර ෆ්ලෙචර් (06) කඩුල්ල මුවා කිරීමේ වරදට හසුව දැවී යෑමත් සමග වාර්ෂාව ඇද හැලූණි.   ආරම්භක පිතිකරු ජොන්සන් චාල්ස් ලකුණු 4 ක් ලබා සිටියදී ලසිත් මාලිංග යැවූ ඉනිමේ පළමු  ඕවරයේ සිවුවැනි පන්දුවේදී දැවී ගියේය. ශ‍්‍රී ලංකා පිලේ නායක ඇන්ජලෝ මැතිව්ස් කාසියේ වාසිය ලබා පළමුව පන්දු යැවීමට තීරණය කළේය. ආර්. පේ‍්‍රමදාස ක‍්‍රීඩාංගණයේදී පැවැති දෙවැනි එක්දින තරගයට ක‍්‍රීඩා කළ සචිත‍්‍ර සේනානායක වෙනුවට වේග පන්දු යවන ක‍්‍රීඩක දුෂ්මන්ත චමීර මෙම තරගයට කැදවා තිබුණි. කොදෙව් පිලට ජේසන් හෝල්ඩර් සහ දිනේෂ් රැම්ඞීන් ඇතුළත්ව සිටින අතර දෙවැනි තරගයට ක‍්‍රීඩා කළ ජේසන් මොහොමඞ් සහ ජෙරම් ටේලර් ඉවත්කර තිබුණි.    ලකුණු පුවරුව බටහිර ඉන්දීය කොදෙව් පිලජොන්සන් චාල්ස් - ඇ. ඩිල්ෂාන් ප. මාලිංග    4
ඇන්ඩි‍්‍ර ෆ්ලෙචර් - ක. මූ. කළා ප. ලක්මාල්     6
ජර්මේන් බ්ලැක්වුඞ් - ඇ. ඩිල්ෂාන් ප. මාලිංග    2
ඩැරන් බ‍්‍රාවෝ - ප. ලක්මාල්     4
මාලන් සැමුවෙල්ස් - නොදැවී     110
දිනේෂ් රැම්ඞීන් - ඇ. කුසල් ප. චමීර    4
ජොනතන් කාටර් - ඇ. කුසල් ප. මෙන්ඩිස්    6
ජේසන් හෝල්ඩර් - ඇ. කුසල් ප. චමීර    19
කාලෝස් බ‍්‍රැත්වෙයිට් - ක. මූ. කළා ප. මෙන්ඩිස්     18
සුනිල් නරේන් - ඇ. චන්දිමාල් ප. මැතිව්ස්    9
රවී රාම්පෝල් - නොදැවී    2
අතිරේක    22
එකතුව  ඕවර 36 කදී කඩුලූ 9 ක් දැවී     206 කඩුලූ වැටීම:
1-4(චාල්ස්), 2-12(ෆ්ලෙචර්), 3-16(බ්ලැක්වුඞ්), 4-18(බ‍්‍රාවෝ), 5-52(රැම්ඞීන්), 6-84(කාටර්), 7-109(හෝල්ටර්), 8-164(බ‍්‍රැත්වෙයිට්), 9-195(නරේන්) පන්දු යැවීම:
ලසිත් මාලිංග: 7-0-43-2, සුරංග ලක්මාල්: 7-0-40-2, දුෂ්මන්ත චමීර: 7-0-39-2, මිලින්ද සිරිවර්ධන: 5-0-17-0, අජන්ත මෙන්ඩිස්: 8-0-51-2, ඇන්ජලෝ මැතිව්ස්: 2-0-11-1 
ශ‍්‍රී ලංකා පිලකුසල් පෙරේරා - ඇ. බ්ලැක්වුඞ් ප. රාම්පෝල්    50
තිලකරත්න ඩිල්ෂාන් - ඇ. කාටර් ප. බ‍්‍රැත්වෙයිට්    21
ළහිරු තිරිමාන්න - ඇ. සැමුවෙල්ස් ප. හෝල්ඩර්    21
දිනේෂ් චන්දිමාල් - ඇ. රැම්ඞීන් ප. කාටර්     23
ඇන්ජලෝ මැතිව්ස් - නොදැවී    27
මිලින්ද සිරිවර්ධන - ඇ. රැම්ඞීන් ප. හෝල්ඩර්    17
ෂෙහාන් ජයසූරිය - නොදැවී    11
අතිරේක    10
එකතුව  ඕවර 32.3 කදී කඩුලූ 5 ක් දැවී     180 පන්දුවට පහර නොදුන් පිතිකරුවෝ:
දුෂ්මන්ත චමීර, ලසිත් මාලිංග, අජන්ත මෙන්ඩිස්, සුරංග ලක්මාල් කඩුලූ වැටීම:
1-40(ඩිල්ෂාන්), 2-95(තිරිමාන්න), 3-103(කුසල්), 4-134(චන්දිමාල්), 5-161(මිලින්ද) පන්දු යැවීම:
රවී රාම්පෝල්: 5-0-34-1, සුනිල් නරේන්: 7.3-1-24-0, ජේසන් හෝල්ඩර්: 7-0-44-2, කාලෝස් බ‍්‍රැත්වෙයිට්: 7-0-40-1, ජර්මේන් බ්ලැක්වුඞ්: 3-0-16-0, ජොනතන් කාටර්: 3-0-19-1 ඡායාරූප - ශාන්ත රත්නායක